历史，黐实喺张相度之一

        依间屋冇咗啦，依条街冇咗啦，我外公，亦冇咗四十几年啦。

        张相影于小北路洪桥街新田里一号。

        外公原住西关，家族曾经富有，属官二代。但我认识我外公之日起，佢就系个穷光蛋。自从日本仔入侵广州，我冇结婚的三姨妈同大舅父扶老携幼，走难老隆，光复后，就回城定居依度。大概因为外公嘅侄仔，旧时叫工商地主，宜家叫广州商会会长的邹殿邦住喺附近吧。

        宜家提起邹殿邦，哽系乜事都冇啦，1966年喺学校，请个老农嚟忆苦思甜，佢一开口讲邹殿邦，就吓到我鼻哥窿都冇肉，好彩隐瞒得密实，冇人知道我同依个从未见过嘅表哥有啦褦（牵连），唔系唔死都一身潺。不过有次我老母畀邹殿邦个轿夫认出嚟，我老母系洪桥街街道工作积极份子，畀个街坊穿煲就好大镬，又好彩依个轿夫同原雇主并无阶级矛盾，同我老母有倾有讲，又蒙混过关了。

        啲相宜家扐出嚟晒，就好有价值，但以前扐出嚟晒，就惹事上身。

        阿公揸枝“士的”着唐装嘅哩张相，喺在中山工作嘅邹玮瑛挂系厅度嘅，文革时，畀红卫兵揪住咗，幸好二姨妈拎出一张《光荣军属》牌子，挡咗驾。革命嘅小将以为依张相代表咗解放前乜嘢敌人的身份，其实系1962年先至喺中山纪念堂影嘅。阿公行路唔方便，成日扐住枝拐杖，来佬话叫“士的”，同孙中山枝文明棍一个样，纯粹系巧合。外公写一手靓篆书，一世都着唐装，佢识英文，唔知佢留学新加坡学建筑时着乜衫呢。

        这是原照片未剪裁，在香港从二舅父邹其济相册取得。

        而下边哩张相，就大件事嘞。

        依张相翻拍自“真”，宜家也叫拍照片做“写真”，年纪大嘅人，都知道旧时画“真”喺乜事。屋企人死咗，就请人照他嘅样画幅“真”，尽管系个平民百姓，画“真”都画成好似慈禧太后正襟危坐嘅样，全身相，所谓光宗耀祖，其实冒充大头鬼。

        我阿婆嘅“真”受潮，扐出嚟晒太阳，顺便拍咗依张半身相，点知畀一个街坊睇到，文革初期，带班同学嚟抄家，“真”同线装书被烧毁，阁楼上收藏嘅一尊玉佛，也被牵羊啦。

        外公嘅两件遗物，线装的康熙字典同诗韵，因为我扐走咗，嗰时中国唯一一本字典就系小新华字典，我当依本康熙字典为宝，匿过咗劫难。

        阿婆系典型的西关小姐，有关佢嘅事，水蛇膥（春音，卵）咁长，请睇下文《西关小姐》。

        我阿婆卢汉銮张相。认真睇，点解两个人一模一样嘅？原来上世纪照相术传入中国无几耐，时兴一种分身相。先请被摄者企喺左边，摄影师挡住镜头嘅右边拍一下，相机不动，再请被摄者企喺右边，又挡住镜头左边，喺同一张底片上再曝光一次。将一个人玩魔术咁，分为两个拍到一张相里。

        我阿婆，在上世纪三十年代，赶上时髦了，嗰双扎脚唔再扎，叫做放脚。开放，时髦，识饮识食，识讲几句“决么玲”番话，就是西关小姐嘅特色。

        阿婆好早就死了，以前从未见过阿婆个相，我有个舅父，解放前十几岁去咗澳门，做咗成世警察仔，死都唔敢返大陆，改革开放后，我去澳门探佢，先第一次睇到依张相。问佢攞咗返嚟。

        阿婆大家闺秀，正宗西关小姐，唔知点解嫁畀咗我阿公嘅，其实阿公个老窦曾经门当户对，邹梦楠喺清朝广州二品官。阿婆姓卢，系当时西关四大首富卢文锦嘅千金。卢文锦的资料我亦系近十几年先知道。

        我二外婆吴侍仪。分身相外婆身边嘅小孩，我叫五姨，是二外婆所生。嗰个时代中国重未规定一夫一妻制度，妻妾之间都系和睦一家。几个老婆嘅未必系有钱佬。生出嚟嘅细路仔，女还女排，五姨就系第五个女，而仔，则堂兄弟排到一齐，所以我嘅大舅父叫做十七舅父，我嘅二舅父，叫做廿二舅父。

        以下关于广州首富排名出自《广州番鬼录》，作者威廉.C.亨利，是当时广州仅有的几个懂中文的外国侨民之一。
        卢文锦喺广州十三行排名第二嘅行商，被洋人称茂官（与父亲同称茂官，查无此类官职，官也可作对人的称呼，如看官，可能是外国人称呼之商名），住十七甫卢宅。排名第一是潘有度，被称启官，而名声最显赫是伍秉鉴，被称浩官，大概是后来居上吧。有英国名画家钱纳利为茂官卢文锦所作嘅画像，堪称杰作，评价很高，喺香港汇丰银行收藏嘅珍品。若唔系香港历史博物馆展出此画，香港表妹阿娴叫我拿拿声过去睇，我都唔知太公系点个样。

        卢文锦嘅史料不少，发觉有啲咁嘅趣事：

        卢文锦老窦卢观恒，原系贫苦出生，后嚟喺十三行创业成富豪，于是大做善事。卢观恒死后，第二代卢文锦继承父业，并纳款给京官，奉准佢老窦卢观恒入祀新会乡贤祠，引起士绅不满。当时有个举人叫刘华东，佢自称文学柳宗元，书学柳公权，人品则学柳下惠，所以又号三柳居士，乃喺民间广为流传嘅“扭计精”。佢上告一状，就迫使两广总督收回压迫十三行华商嘅成命。又话佢曾以一理之据，当街用纸扇敲打清朝将军嘅狗头，使之不敢计较。

        刘华东自己出书反对卢文锦贿赂官绅，将冇“学历”嘅卢观恒入祀乡贤祠，最后清廷派“纪检”南下查问，结果各打五十大板，除去咗卢观恒的从祀资格，但刘华东却因此被拘留咗四个月，并被革去咗举人嘅功名。

        卢文锦大概宜家冇人识得，但卢薛昌“午时茶”就重有好多老广州认识，旧时深受市民喜欢，老少咸宜嘅凉茶。卢薛昌就系我阿婆个细佬，个药厂我细时都去过，门市喺十三行，“蛇王满”隔嚟。五反运动后公司合营，药厂被拼入广州中药厂， “午时茶”改名“合仔茶”，宜家叫乜就唔知了。另一讲法系拼入咗王老吉。

        珠海史料有一段记录：鸦片战争前夕，有几个英国人登淇澳岛，见几只牛犊子很肥壮，就折些竹枝鞭打牛犊子取乐。看牛仔回来大喊：“英国人抢牛！”村里人将英国人痛打一顿，后英国人派人来索赔伤药费，不给，他们即开木头战舰开炮打过来。双方开战后，英国人败，引发外交纠纷。事件记录中有两广总督卢坤在致洋商卢文锦等的谕令，可见卢文锦是作为外交翰旋人物。

        羊城晚报2012-05-01刊文《清代廣州首富的手跡》，作者说道：

        香港春季藝術品拍賣季，我看中了一本小小冊頁，不為別的，就買上面幾個廣東人的題跋。

        這是一套《蘭亭序》拓本，這冊《蘭亭序》屬于四大家族之中伍氏（伍秉鉴）的收藏。蘭亭拓本本來不稀奇，只不過這套拓本是宋代所拓。宋代所拓也不特別，特別的是拓本上面題跋的人。

        單是扉頁上面的一條小紙，就足以引出一段掌故，這紙條長五寸，上面寫著幾個端正的楷書︰盧文錦拜觀于穆穆書室，甲戌上元。

        作者梁基永，似对卢文锦很了解，文章还写了不少关于卢文锦的史料。

        邹尭常与卢汉銮的家庭医生柯度（德国人）合伙开设的德国大药房，在广州粤海关大楼旁边。